امام علیؑ اور تین سوالات کا واقعہ :
مسجد الحرام میں داخلہ
امیر المومنین امام علیؑ مسجد الحرام کی جانب آئے۔ اس وقت ان کے ساتھ امام حسنؑ بھی موجود تھے۔ انہوں نے سلمان فارسی کے بازو کی ٹیک لی ہوئی تھی۔
جب امام علیؑ مسجد الحرام کے اندر تشریف لے آئے تو ایک ایسا شخص ان کے پاس آیا جس نے نہایت عمدہ اور خوبصورت لباس زیب تن کیا ہوا تھا۔ اس نے امام علیؑ کو سلام کیا۔ امامؑ نے اس کے سلام کا جواب دیا تو وہ آپ کے پاس ہی بیٹھ گیا اور عرض کرنے لگا:
سوالات کا چیلنج
“میں آپ سے تین مسئلے پوچھوں گا۔ اگر تو آپ نے مجھے ان کے بارے میں بتا دیا تو میں سمجھ جاؤں گا کہ لوگ آپ کے متعلق اس معاملے میں پھنس گئے ہیں کہ اب انہیں نہ دنیا میں امن و سکون حاصل ہو سکتا ہے اور نہ آخرت میں۔ بصورت دیگر اگر آپ جوابات نہ دے سکے تو میں سمجھ جاؤں گا کہ آپ اور وہ باہم برابر ہیں اور آپؑ میں اور ان میں کوئی فرق نہیں۔”
امیر المومنینؑ نے فرمایا، “جو تیرا دل کرے وہ سوال پوچھ۔”
اس نے کہا،
“مجھے یہ بتائیں کہ:
امیر المومنینؑ نے فرمایا، “جو تیرا دل کرے وہ سوال پوچھ۔”
- انسان جب سوتا ہے تو اس کی روح کہاں جاتی ہے؟
- انسان کے حافظے اور نسیان کا سبب کیا ہے؟
- اور انسان کی اولاد اپنے چچاؤں اور ماموؤں کے مشابہ کیسے ہوتی ہے؟”
امام حسنؑ سے رجوع
اس شخص کے سوالات سن کر مولائے کائناتؑ نے امام حسن مجتبیٰؑ کی جانب دیکھا اور فرمایا:
“اے ابا محمدؑ، اس کے سوالات کے جوابات دیجیے۔”
پہلا سوال: نیند میں روح کہاں جاتی ہے؟
امام حسنؑ گویا ہوئے:
“اے شخص، پہلا سوال تو نے انسان کی روح کے متعلق کیا ہے کہ جب وہ سوتا ہے تو اس کی روح کہاں جاتی ہے؟ تو اس کا جواب یہ ہے کہ انسان کی روح ایک خوشبو سے متصل ہوتی ہے اور وہ خوشبو ہوا کے ساتھ جڑی رہتی ہے تا وقتیکہ انسان کا بدن بیدار ہونے کے لیے حرکت کرتا ہے۔ تو جب اللہ تعالیٰ اذن دیتا ہے کہ اس روح کو انسان کی طرف پلٹا دیا جائے تو روح اس خوشبو کو کھینچتی ہے اور وہ خوشبو ہوا کو کھینچتی ہے تو روح بدن میں واپس آ جاتی ہے۔
اور جب اللہ تعالیٰ اس روح کو بدن میں پلٹانے کا حکم نہیں دیتا تو ہوا اس خوشبو کو اپنی طرف کھینچتی ہے اور خوشبو روح کو کھینچتی ہے۔ تو وہ آدمی کے بدن کی جانب واپس نہیں پلٹتی۔”
دوسرا سوال: حافظہ اور نسیان کی وجہ
“تیرا دوسرا سوال انسان کی یاداشت اور حافظے کی کمزوری کی وجہ معلوم کرنے کے بارے میں ہے۔ تو اس کا جواب یہ ہے کہ انسان کا دل ایک ظرف میں ہوتا ہے جس پر ایک پردو سا بنا ہوا ہوتا ہے۔
جب بھی کوئی انسان رسولؐ دو عالم پر کامل درود یعنی ‘اللہم صلی علی محمدؑ و آل محمدؑ و عجل فرج آل محمدؑ’ پڑھتا ہے تو وہ پردہ ہٹ جاتا ہے اور انسان کو بھولی ہوئی باتیں یاد آ جاتی ہیں۔”
تیسرا سوال: اولاد کی مشابہت
“تو نے تیسرا سوال یہ کیا ہے کہ انسان کے بچے اپنے ماموؤں اور چچاؤں کے مشابہ کیوں ہوتے ہیں تو اس کا جواب یہ ہے کہ جب انسان اپنی بیوی کے پاس سکون قلب، ٹھہری ہوئی رگوں اور غیر مضطرب بدن کے ساتھ جاتا ہے تو نطفہ عورت کے رحم میں ٹھہر جاتا ہے۔ پھر جو بچہ پیدا ہوتا ہے وہ اپنے والدین کے مشابہ ہوتا ہے۔
لیکن اگر وہ اس کے پاس بلا سکون قلب اور مضطرب رگوں اور مضطرب بدن کے ساتھ جائے تو عورت کے رحم میں نطفہ میں اضطراب پیدا ہو جاتا ہے اور وہ جا کر کسی رگ پر گرتا ہے۔
اگر وہ چچاؤں والی رگوں میں سے کسی رگ پر گرے تو بچہ اپنے چچاؤں کا ہمشکل ہوتا ہے اور اگر وہ ماموؤں والی رگوں میں سے کسی رگ پر جا کر گرے تو وہ بچہ اپنے ماموؤں کے مشابہ ہوتا ہے۔”
یمان کی گواہی
یہ سب جوابات سن کر وہ شخص پکار اٹھا:
“میں گواہی دیتا ہوں کہ خدا کے سوا کوئی معبود نہیں، اور میں ہمیشہ اس گواہی پر قائم رہوں گا۔
اس کے بعد میں گواہی دیتا ہوں کہ حضرت محمدؐ اللہ کے رسول ہیں۔ اس گواہی پر بھی میں ہمیشہ قائم رہوں گا۔”
پھر اس شخص نے مولا علیؑ کی جانب اشارہ کیا اور کہا:
“میں شہادت دیتا ہوں کہ آپ رسولؐ اللہ کے وصی اور ان کی حجت کو قائم کرنے والے ہیں، اور میں اس گواہی پر بھی قائم رہوں گا۔”
