صلہ رحمی، درازی عمر والا عمل – قطع رحمی، زندگی کم کرنے والا عمل

لمبی عمر کی خواہش

اس  فانی دنیا میں موجود  ہر شخص ذیادہ زندگی جینے کا خواہش مند ہے۔ ایک دوسرے کو دعا دیتے وقت بھی اس چیز کا خصوصی طور پر خیال رکھا جاتا ہے کہ انسان کو طول عمر کی دعا دی جائے۔

  اسی لیے روایات میں متعدد جگہ ایسے اعمال وارد ہوئے ہیں جن سے انسان کی زندگی میں اضافہ ہوتا ہے۔ آئمہ اہلبیت علیہم السلام کی اس سلسلے میں  بیسیوں احادیث موجود ہیں جو سلسلہ وار کتب سے ہوتی ہوئی ہم تک آج پہنچی ہیں۔

انہی اعمال میں  سے ایک عمل صلہ رحمی کرنا ہے یعنی کہ اپنے رشتہ داروں، قوم قبیلہ والوں سے رشتہ جوڑ کر رکھنا، ان کے حقوق ادا کرنا اور  ان کے ساتھ حسن سلوک سے پیش آنا۔ آئمہ معصومینؑ کی جانب سے وارد شدہ روایات میں اس چیز کی بے حد تاکید کی گئی ہے اور اہمیت کواجاگر کیا گیا ہے۔   بلکہ رسول اللہﷺ نے تو صلہ رحمی کرنے کو دین کا حصہ قرار دیا ہے۔

موسیٰ کا اللہ سے سوال

حضرت موسیٰؑ نے اللہ تعالیٰ سے پوچھا کہ یا خدا جو شخص صلہ رحمی کرتا ہے تو تو اسے کیا اجر دیتا ہے؟ خدا نے کہا،؛ اے موسیٰؑ، میں اس کی زندگی بڑھا دیتا ہوں اور اس کے لیے موت کی سختی کوآسانی میں بدل دیتا ہوں۔’ (میزان الحکمت، جلد 04، صفحہ 170)۔

مندرجہ بالا  روایت سے یہ مستفاد ہوتا ہے کہ  صلہ رحمی ایک ایسا عمل ہے جس سے انسان کی زندگی بڑھ جاتی ہے۔معصومینؑ کے کلام سے ملتا ہے کہ بسا اوقات ایسا ہوتا ہے کہ انسان کی زندگی فقط تین سال بچ گئی ہوتی ہے لیکن وہ اپنے رشتہ داروں سے صلہ رحمی کرتا ہے ان کے حقوق ادا کرتا ہے تو اللہ تعالیٰ اس سے راضی ہو کر اس کی بچی ہوئی تین سال کی زندگی کو بڑھا کر تیس سال کر دیتا ہے۔

امام صادقؑ کا میسر کو فرمان

یہی وجہ ہے کہ چھٹے مولا امام جعفر صادقؑ نے  میسر سے فرمایا تھا، ‘اے میسر، تمہاری موت ایک سے زائد مرتبہ تمہارے پاس آ چکی ہے لیکن ہر مرتبہ تیرے صلہ رحمی کرنے کے سبب تیری موت تجھ سے ٹال دی جاتی ہے۔’ ( میزان الحکمت، جلد 04 صفحہ 174)۔

فرمان مولاؑ سے یہ چیز عیاں ہوتی ہے کہ فقط ایک مرتبہ نہیں بلکہ ایک سے زائد مرتبہ میسر کی موت  صرف صلہ رحمی کے سبب اس سے ٹال دی گئی اور خدا نے اسے طول عمر عطا کی۔  یعنی انسان جتنا اس عمل صالح کو اپنائے رکھے گا خدا اس کی عمر میں اضافہ کرتا رہے گا۔

ساتویں امامؑ کی خدمت میں آئے نوجوان کا واقعہ

ایک نوجوان ساتویں امام موسیٰ کاظمؑ کی خدمت اقدس میں حاضر ہوا۔ جیسے ہی یہ نوجوان مولاؑ  کے  سامنے آیا ، امامؑ نے پوچھا، ‘اے بندہ خدا، کیا کام کر کے آئے ہو کہ اللہ تعالیٰ نے تمہاری زندگی کئی سال بڑھا دی ہے۔’

اس نوجوان نے کافی سوچا اور کہنے لگا،  ‘مولاؑ، اور تو کچھ نہیں لیکن ابھی آپ کی خدمت میں حاضر ہونے کو جب آ رہا تھا تو راستے میں میری پھوپھی کا گھر آتا ہے۔ میں نے سوچا جب اسی راستے سے ہی گزرنا ہے تو اپنی پھوپھی کو بھی ملتا چلوں۔ بس ابھی ابھی تو یہی کام کر کے آیا ہوں۔’

یہ سننا تھا کہ امام موسیٰ کاظمؑ نے فرمایا، تیرا یہی کام خدا کو اتنا پسند آیا کہ  اس نے تیری زندگی بڑھا دی ہے۔

محترم قارئین، جیسا کہ صلہ رحمی کرنے سے خدا انسان کی عمر بڑھا دیتا ہے بالکل اسی طرح اس کے بر عکس انسان اگر قطع تعلق کرے  یعنی رشتہ داروں سے تعلق حتم کر لے تو خدا انسان کی زندگی کو کم کر دیتا ہے۔

فرامین معصومینؑ سے واضح ہوتا ہے کہ بسا اوقات ایسا ہوتا ہے کہ انسان کی زندگی تیس سال بچی ہوتی ہے لیکن وہ قطع  رحمی کرتا ہے تو اللہ تعالیٰ اس سے ناراض ہو کر اس کی بچی ہوئی تیس سال کی  زندگی کو تین سال میں بدل دیتا ہے۔(میزان الحکمت، جلد 04 صفحہ 173)۔

جلد فنا کا سبب

یہی وجہ تھی کہ امیر المومنین امام علیؑ فرمایا کرتے تھے، ‘میں ان گناہوں سے اللہ تعالیٰ کی پناہ مانگتا ہوں جو زندگی کے جلد خاتمے کا موجب بنتے ہیں۔’ پوچھا گیا مولاؑ کیا گناہ بھی انسان کے جلد مر جانے کا سبب ہوتے ہیں؟

مولاؑ نے فرمایا ہاں، اور انہی کاموں میں سے ایک قطع رحمی ہے۔

قطع تعلق کے سبب سب مر گئے!!

ایک شخص امام جعفر صادقؑ کی خدمت اقدس میں حاضر ہوا اور کہنے لگا مولاؑ میرے بھائیوں  اور میرے چچا زاد بھائیوں نے مجھے تنگی میں مبتلا کر رکھا ہے، اور گھر میں میرا حصہ ہتھیا لیا ہے اور میرے لیے فقط ایک کمرہ چھوڑا ہے۔  اور اگر میں چاہوں تو حکومت سے شکایت کر کے سب کچھ واپس لے سکتا ہوں۔

اس کی شکایت سن کر امامؑ نے فرمایا، ‘صبر کرو، خداوند عالم بہت جلد تمہیں خوش حال کر دے گا۔’ بعد ازاں ایک وبا آئی اور وہ سب لوگ مر گئے۔

شکایت کنندہ دوبارہ جب امامؑ کی خدمت میں حاضر ہوا تو امام ؑ نے اس بابت سوال کیا تو وہ کہنے لگا کہ وہ سب  کے سب مر گئے۔  یہ سن کر امامؑ نے فرمایا، ‘اس قطع رحم کے سبب جو انہوں نے تمہارے ساتھ کیا تھا ، وہ مر گئے!’ (گناہان کبیرہ، جلد 01 صفحہ 188)۔

فرشتے نازل نہیں ہوتے

رسول ﷺ دو  عالم فرماتے ہیں کہ ایسی قوم کہ جس میں کوئی قطع رحمی کرنے والا ہو ایسی قوم  پر فرشتے نازل نہیں ہوتے۔

رحمت نازل نہیں ہوتی

رسول خداﷺ فرماتے ہیں کہ جس قوم میں کوئی قطع رحمی کرنے والا ہوتا ہے تو  اس قوم پر رحمت نازل نہیں ہوتی۔

موت سے پہلے سزا

پانچویں امام محمد باقرؑ فرماتے ہیں کہ تین عادتیں ایسی ہیں کہ  جن کا خمیازہ انسان  کو مرنے سے پہلے پہلے بھگتنا پڑتا ہے۔ ان میں پہلی ظلم کرنا، دوسری جھوٹی قسم کھانا اور تیسری قطع رحمی کرنا ہے۔ (گناہان کبیرہ، جلد 01 صفحہ 188)

اموال بد ترین ہاتھوں میں

امیر المومنین امام علیؑ فرماتے ہیں کہ جب  لوگ قطع رحمی کرنے لگیں گے تو اموال بد ترین لوگوں کے ہاتھوں میں چلے جائیں گے۔ (میزان الحکمت، جلد 04 صفحہ 179)

بہشت کی خوشبو بھی نہیں سونگھ سکتا

روایت ہے کہ بہشت کی خوشبو دو ہزار سال  کے فاصلے سے انسان کے دماغ میں پہنچ جائے گی لیکن والدین کے نافرمان بیٹے اور قطع تعلق کرنے والے اس کی خوشبو ہر گز نہیں سونگھ سکیں گے۔ (گناہان کبیرہ، جلد 01 صفحہ 189)

خدا ہم سب کو تعلیمات اہلبیتؑ پڑھنے، سمجھنے، ان پر عمل کرنے اور پھر اس عمل کو اپنی  آخرت تک کے لیے محفوظ رکھنے کی توفیق عطا فرمائے۔ آمین!

ہم معزز قارئین کی جانب سے مثبت رد عمل کے منتظر ہیں نیز آپ سب کے تعاون کی توقع کرتے ہیں کہ علوم آل محمدؑ کی ترویج میں ہمارے معاون ثابت ہوں اور اس معلومات کو اپنے دوست احباب اور عوام الناس تک پہنچائیں۔ نیز ہماری اصلاح کے لیے کوئی مشورہ یا رائے دینا چاہیں تو تبصرے کے خانے میں ہمیں مطلع فرمائیں۔ آپ کی قیمتی رائے کا احترام کیا جائے گا۔ جزاکم اللہ خیرا